JENERALI HUSSEIN SALAMI: MAREKANI IMESHINDWA KUKABILIANA NA JAMHURI YA KIISLAMU YA IRAN

Naibu wa Kamanda wa Jeshi la Walinzi wa Mapinduzi ya Kiislamu nchini Iran (SEPAH) amesema kuwa Marekani ambayo imezowea kuzivamia na kuzikalia kwa mabavu nchi nyingine, lakini imeshindwa kukabiliana na taifa la Iran ya Kiislamu, kama ambavyo imefeli pia.

Brigedia Jenerali Hussein Salami  ameyasema hayo mkoani Kerman kusini mashariki mwa Iran na kuongeza kuwa, kuendelea kusimama imara taifa la Iran mbele ya maadui sambamba na kulinda ardhi yake yote na kuwafanya maadui kushindwa, yote hayo yametokana na baraka za mashahidi waliojitolea nafsi zao kwa ajili ya taifa hili. Amesisitiza kuwa, hii leo Wairan wamefungia maadui milango yote ya kuingilia kuanzia ardhini, angani na baharini na kuongeza kuwa hadi sasa maadui hawana njia yoyote ya kuweza kuivamia nchi hii.

Uimara na umaridadi wa Iran mkabala wa Marekani

Brigedia Jenerali Hussein Salami Amesema maadamu taifa la Iran litaendelea kumtii kiongozi Muadhamu wa Mapinduzi ya Kiislamu, kamwe halitashuhudia kushindwa na adui. Akibainisha kwamba katika kipindi cha miaka minane ya vita vya kulazimishwa adui hakuweza kufikia malengo yake na kushindwa, Naibu wa Kamanda wa Jeshi la Walinzi wa Mapinduzi ya Kiislamu nchini Iran (SEPAH) amesema, hii leo ambapo Iran ya Kiislamu imeimarika sana kamwe haitomruhusu adui kuweza kupenya nchini hapa.

Makomando wa jeshi la Iran wanaoitia kiwewe Marekani

Amefafanua kuwa, nchini Lebanon Harakati ya Kiislamu ya Hizbullah imezidi kung'ara na hii leo harakati hiyo ni nembo ya muqawama na ambayo imehusika katika kuleta mabadiliko makubwa ya kisiasa katika eneo. Ameongeza kuwa, nchini Syria pia ambapo uistikbari ulikuwa unakusudia kuvunja safu ya muqawama, hata hivyo umeshindwa kufikia malengo yake kutokana na maelekezo ya Kiongozi Muadhamu wa Mapinduzi ya Kiislamu.