Wednesday, November 22, 2017

KUJIUZULU MUGABE NA MUSTAKABALI WA KISIASA WA ZIMBABWE

Kujiuzulu Mugabe na mustakabali wa kisiasa wa Zimbabwe
Hatimaye baada ya takribani wiki moja ya changamoto, mivutano na uingiliaji wa jeshi hatimaye Rais Robert Gabriel Mugabe wa Zimbabwe ameng'atuka madarakani. Mugabe amechukua hatua hiyo baada ya Bunge kuanzisha mchakato wa kumsaili kwa lengo la kumuuzulu.
Kujiuzulu Mugabe kumehitimisha karibu miongo minne ya utawala wake nchini Zimbabwe. Pamoja na hayo japokuwa kujiuzulu kwake kumewafurahisha Wazimbabwe wengi wakiwemo wanachama na wafuasi wa chama chake tawala cha ZANU-PF lakini wako pia waliohuzunishwa. Ni kama alivyosema Terence Mukupe, mbunge na mwanachama wa Zanu-pf ya kwamba: "wabunge wa chama tawala hawakutaka mwisho wa rais wao uwe kama hivi. Sisi tunampenda rais, lakini wakati ulikuwa umeshafika wa yeye kujistaafisha mwenyewe. Waliomzunguka walikuwa wakimshauri vibaya sana. Tunasikitika sana amefikia ukingoni namna hivi".
Mugabe akihutubia siku ya uhuru wa Zimbabwe mwaka 1980
Robert Mugabe aliingia madarakani nchini Zimbabwe mwaka 1980 akiwa anajulikana kama shakhsia mashuhuri zaidi wa mapambano dhidi ya ukoloni na harakati za kupigania uhuru wa nchi yake. Mugabe alikuwa pia mmoja wa shakhsia wakubwa wa mapambano dhidi ya ubaguzi wa rangi na mfumo wa Apathaidi katika nchi jirani na Zimbabwe ya Afrika Kusini.
Robert Mugabe aliongoza mapambano dhidi ya wakoloni hadi nchi yake ikapata uhuru; na akiwa kiongozi wa mapambano ya ukombozi wa Zimbabwe, akawa waziri mkuu wa kwanza wa taifa hilo changa wakati huo. Mara baada ya kushika madaraka, kwa kutumia kaulimbiu ya umoja alianzisha sera ya kuleta maridhiano nchini. Waziri Mkuu huyo wa Zimbabwe aliamua kukabidhi nyadhifa na vyeo muhimu kwa raia wazungu. Kutokana na hatua yake hiyo, katika kipindi cha karibu muongo mmoja Zimbabwe ilipata mafanikio mazuri kiuchumi, ikapiga hatua kuelekea kwenye ustawi kwa kujenga mashule, vituo vya afya na tiba pamoja na kuwajengea nyumba raia wazalendo weusi ambao ndio wanaounda idadi kubwa ya watu wa nchi hiyo. 
Majenerali wa jeshi walioongoza kampeni ya kumwondoa Mugabe madarakani
Pamoja na hayo, kuwakandamiza wapinzani na kutekeleza sera za chama kimoja zilikuwa miongoni mwa siasa za Mugabe zilizokosolewa sana na wapinzani. Katika hali kama hiyo, umri mkubwa alionao, uingiliaji wa mke wake Grace na kampeni zake za kutaka kutwaa madaraka, hali mbaya ya uchumi  na vilevile kufichuliwa ufisadi uliofanywa na baadhi ya jamaa wa Mugabe na wanachama wa chama chake cha Zanu-pf yote hayo yalishadidisha upinzani dhidi ya kiongozi huyo.
Hivi ndivyo wabunge na maseneta walivyoipokea habari ya kujiuzulu Mugabe
Hivi sasa baada ya Mugabe kuondoka madarakani, hali ya kisiasa nchini Zimbabwe imebadilika. Kwa mujibu wa habari mbalimbali Emmerson Mnangagwa, makamu wa rais ambaye alitimuliwa na Mugabe na ambaye sasa amechaguliwa kuwa mwenyekiti wa Zanu-pf, ndiye atakayeshika hatamu za urais wa nchi. Wachambuzi wengi wanaamini kuwa Mnangagwa ataendeleza siasa za Mugabe, tab'an kwa kutegemea nguvu za jeshi. Pamoja na hayo watu wengi wana wasiwasi wa kutokea hali ya kukomoana na ulipizaji visasi wa ndani ya chama na kuvurugika hali ya kisiasa ya Zimbabwe. Kiasi kwamba kwa kuchelea hali hiyo Katibu Mkuu wa Umoja wa Mataifa Antonio Guterres ametoa wito kwa Wazimbabwe wote "kudumisha utulivu na uvumilivu".
Wananchi wakipachua picha ya Mugabe baada ya kujua kwamba si rais tena wa Zimbabwe
Kurejesha uthabiti wa kisiasa, kujiepusha na sera za kutawala kijeshi na kidikteta, kustawisha maelewano na nchi za eneo na nje ya eneo, kuboresha hali ya uchumi na kuitishwa uchaguzi mkuu katika mwaka ujao wa 2018 katika mazingira tulivu na kwa kuheshimu sheria ni miongoni mwa matarajio muhimu zaidi waliyonayo wananchi; matarajio ambayo kama hayatotimizwa si hasha yakawafanya Wazimbabwe wengi watamani kurejea tena kwenye enzi za Mugabe.../

MNANGAGWA AREJEA ZIMBABWE, KUPISHWAIJUMAA KUMRITHI MUGABE

Mnangagwa arejea Zimbabwe, kuapishwa Ijumaa kumrithi Mugabe
Makamu wa Rais wa Zimbabwe aliyepigwa kalamu nyekundu hivi karibuni na Rais Robert Mugabe aliyetangaza kujiuzulu hapo jana amerejea nchini akitokea Afrika Kusini.
Emmerson Mnangagwa alifutwa kazi wiki mbili zilizopita na kukimbia nchi akihofia usalama wake. Mwanasiasa huyo alipigwa kalamu kutokana na kile wadadisi wa mambo walikitaja kuwa ni hatua ya Mugabe mweye umri wa miaka 93 kumsafishia njia mkewe Grace Mugabe, arithi kiti chake.
Wananchi wa Zimbabwe mjini Harare wamebeba mabango yenye picha za Mnangagwa zilizoambatana na jumbe zisemazo: Karibu nyumbani shujaa wetu; Uliahidi utarejea na kweli umerejea, karibu sana. Baadhi ya picha za mwanasiasa huyo zilikuwa na jina lake la utani la "Mamba".
Jacob Mudenda, Spika wa Bunge la nchi hiyo amesema maandalizi ya kumuapishwa Mnangagwa Ijumaa ijayo ili kuchukua nafasi ya Mugabe yanaelekea kukamilika.
Mugabe na Mnangagwa katika sherehe ya taifa huko nyuma
Akiongea baada ya kukutana na Rais Jacob Zuma wa Afrika Kusini kabla ya kuondoka nchini humo mapema leo, Mnangagwa amesema: "Taifa hili halipaswi tena kushikwa mateka na mtu mmoja, ambaye yuko tayari kufia ofisini kwa gharama yoyote ile."
Hapo jana Jumanne, Mugabe katika barua yake kwa Spika wa Bunge, alisema amejiuzulu kwa khiari yake mwenyewe ili kupisha mapokezano ya uongozi kwa njia ya amani, baada ya kuiongoza nchi hiyo ya kusini mwa Afrika kwa miaka 37.
Baada ya Spika wa Bunge la Zimbabwe kutoa tangazo la kujiuzulu kwa Mugabe, wananchi wa taifa hilo walijitokeza mabarabarani kwa shangwe, nderemo na vifijo kusherehekea habari hizo.

UMOJA WA MATAIFA WAIKOSOA BURUNDI KWA KUTISHIA MAAFISA WAKE

Umoja wa Mataifa waikosoa Burundi kwa kutishia maafisa wake
Ofisi ya masuala ya haki za binadamu ya Umoja wa Mataifa imeikosoa vikali serikali ya Burundi kwa kuwatishia wataalamu wa uchunguzi wa umoja huo.
Rupert Colville, msemaji wa Zeid Ra'ad al-Hussein, Kamishna Mkuu wa Haki za Binadamu wa Umoja wa Mataifa ameiandikia barua serikali ya Bujumbura akiitaka iwaonye maafisa wake dhidi ya kutishia maisha ya wajumbe wa Kamisheni ya Uchunguzi ya UN, waliotoa mwito wa kubebeshwa dhima maafisa wa ngazi za juu wa Burundi wanaotuhumiwa kufanya jinai dhidi ya binadamu.
Katika barua hiyo, Colville amesema Burundi kama nchi mwanachama wa Baraza la Haki za Binadamu la Umoja wa Mataifa inapaswa kushirikiana na kuheshimu maamuzi ya chombo hicho.
Hivi karibuni, Burundi ilitangaza kuwa haitashirikiana na Mahakama ya Kimataifa ya Jinai (ICC) katika uchunguzi wa jinai za kivita na ukatili uliofanyika nchini humo katika kipindi cha miaka miwili iliyopita.
Maafisa usalama wa Burundi wanatuhumiwa kuhusika na mauaji ya raia
Novemba 9 mwaka huu, majaji wa mahakama hiyo waliruhusu kuanzishwa uchunguzi kuhusu ukatili na jinai dhidi ya binadamu uliofanywa katika kipindi cha kati ya mwaka 2015 na 2017 dhidi ya raia wa Burundi ndani au nje ya nchi hiyo. Jinai hizo ni pamoja na mauaji, ubakaji, ukatili na mateso yaliyoanza mwaka 2015 baada ya Rais wa Burundi, Pierre Nkurunziza kutangaza nia yake ya kugombea kiti hicho kwa muhula wa tatu mfululizo. 
Ni vyema kuashiria hapa kuwa, Oktoba 26, Burundi ilijiondoa rasmi kwenye Mkataba wa Roma uliounda ICC.

BAADA YA MUGABE KUJIUZULU, UMOJA WA MATAIFA WAWATAKA WAZIMBABWE KUDUMISHA UTULIVU

Baada ya Mugabe kujiuzulu, Umoja wa Mataifa wawataka Wazimbabwe kudumisha utulivu
Umoja wa Mataifa umewataka wananchi wa Zimbabwe kudumisha amani na utulivu katika kipindi hiki baada ya Rais Robert Mugabe kutangaza kujiuzulu hapo jana.
Antonio Guterres, Katibu Mkuu wa Umoja wa Mataifa amewataka wananchi wa nchi hiyo kudumisha amani na utulivu katika kipindi hiki inachopitia nchi yao baada ya kiongozi wa nchi hiyo kujiuzulu.
Katibu Mkuu wa Umoja wa Mataifa amezitaka tawala zote kuheshimu matakwa ya wananchi. Rais Robert Mugabe wa Zimbabwe hatimaye jana alisalimu amri na kukubali kujiuzulu kufuatia mashinikizo ya kila upande ya kumtaka aachie madaraka. 
Jacob Mubenda, Spika wa Bunge la Zimbabwe alitangaza jana kwamba, amepokea barua ya kujiuzulu kutoka kwa kiongozi huyo mkongwe mwenye umri wa miaka 93.
Robert Mugabe amejiuzulu baada ya kuiongoza Zimbabwe kwa miaka 37
Katika barua hiyo ya kujiuzulu, Mugabe alisema anajiuzulu kwa hiari, ili kupisha mapokezano ya uongozi kwa njia ya amani, baada ya kuiongoza nchi hiyo ya kusini mwa Afrika kwa karibu miongo minne.
Baada ya Spika wa Bunge la Zimbabwe kutoa tangazo la kujiuzulu kwa Mugabe, wananchi wa taifa hilo walijitokeza mabarabarani kwa shangwe, nderemo na vifijo kusherehekea habari hiyo.
Jeshi la Zimbabwe Jumatano lilitangaza Jumatano iliyopita kwamba, Mugabe na familia yake wapo katika kifungo cha nyumbani na kisha kumuondoa uongozini. Jeshi la Zimbabwe lilichukua hatua hiyo kama radiamali kwa hatua ya siku kadhaa zilizopita iliyochukuliwa na Mugabe ya kumuuzulu aliyekuwa Makamu wake Emmerson Mnangagwa ili aweze kumrithisha nafasi hiyo mkewe  Bi Grace Mugabe.

Sunday, November 19, 2017

MUGABE ATIMULIWA NA KAMA KIONGOZI WA ZANU-PF

Rais Robert Mugabe ametimuliwa kama kiongozi wa chama tawala nchini Zimbabwe – ZANU-PF katika hatua ya kulazimisha kufikishwa kikomo miaka yake 37 madarakani kufuatia mapinduzi ya kijeshi
Simbabwe - Kinderkadetten im Harare-Nationalstadion (Getty Images/AFP/A. Joe)
Nafasi yake imechukuliwa na Emmerson Mnangagwa, naibu wake ambaye alimfuta kazi mwezi huu. Hayo ni kwa mujibu wa duru katika mkutano maalum wa ZANU-PF ulioandaliwa leo kuamua hatima ya Mugabe. Mke wa Mugabe, Bi Grace Mugabe, ambaye alikuwa na mipango ya kumrithi mumewe, pia ametimuliwa chamani.
Muda wa yeye kujiuzulu ni Jumatatu 20.11.2017 saa sita za mchana, lasivyo chama kitaanzisha mchakato wa kumvua madaraka bungeni. Chama cha ZANU-PF kimesema kuwa Mnangagwa atarejeshwa chamani kama kama kaimu kiongozi. Hoja ya kumuondoa Mugabe ilipokelewa kwa shangwe na vifijo na wajumbe wa mkutano
Akizungumza kabla ya mkutano huo wa leo, kiongozi wa chama cha maveterani wa kivita Chris Mutsvangwa amesema Mugabe ambaye ana umri wa miaka 93,  anaishiwa na muda  wa kufanya mazungumzo ya kuondoka kwake na anapaswa kuondoka nchini humo mapema iwezekanavyo.
Mutsvangwa amefuatisha na kitisho cha kuitisha maandamano kama Mugabe atakataa kuondoka, akiwaambia wanahabari kuwa "tutarejesha waandamanaji na watafanya shughuli yao”. Mnangagwa, kiongozi wa zamani wa usalama wa taifa, anayefahamika kama "mamba”, sasa ndiye anaonekana atakayeongoza serikali ya mpito ya umoja wa kitaifa baada ya kuondoka Mugabe ambayo itaangazia kujenga upya mahusiano na ulimwengu wan je na kuuokoa uchumi ambao unashuka kwa kasi.

WIMBI LA KAMATAKAMATA SAUDIA KWA MADAI YA UFISADI LAENDELEA, SASA NI VIONGOZI WA KIJESHI

Wimbi la kamatakamata Saudia kwa madai ya ufisadi laendelea, sasa ni viongozi wa kijeshi
Katika muendelezo wa wimbi jipya la kamatakamata ambalo halijawahi kushuhudiwa nchini Saudia kwa madai ya kufanyika mageuzi na kupambana na ufisadi viongozi wa ngazi ya juu wa kijeshi wametiwa nguvuni nchini humo.
Hayo ni kwa mujibu wa baadhi ya magazeti mashuhuri ya Uingereza ambayo yametangaza kwamba, katika hali ambayo Mohammad Bin Salman Al Saud anadai kufanya marekebisho nchini Saudia, uhalisia wa mambo ni kwamba mrithi huyo wa kiti cha ufalme anapambana na wapinzani wake tu.
Mohammad Bin Salman Al Saud akiwa na Rais Donald Trump wa Marekani
Chanzo kimoja ndani ya ukoo wa kifalme wa Aal-Saud ambacho hakikutaka kutaja jina lake kimefichua kwamba, hadi sasa viongozi 14 wa ngazi ya juu wa gadi ya taifa na Wizara ya Ulinzi ya Saudia ambao wamestaafu, wametiwa nguvuni kwa tuhuma za kushiriki katika kutia saini mikataba ya kifedha inayotia shaka. Kukamatwa viongozi hao wa kijeshi kumeifanya idadi ya watu waliokamatwa katika wiki za hivi karibuni ndani ya taifa hilo, kupindukia 200 ambapo kati yao ni mawaziri wanne na wanamfalme 11 akiwemo Mrithi wa Kiti cha Ufalme wa zamani wa nchi hiyo.
Jinai za Saudi Arabi nchini Yemen
Baadhi ya maafisa wa jeshi wamefichua kwamba kutiwa mbaroni kwa makamanda hao wa kijeshi kumetokana na kushindwa kwao katika vita dhidi ya Yemen. Gazeti la Wall Street Journal limeandika kwamba, Mohammad Bin Salman Al Saud ambaye ameanzisha kile kinachotajwa kuwa ni kupambana na ufisadi wa kiuchumi nchini humo, mbali na kuwatia mbaroni mamia ya shakhsia wakubwa wakiwamo wanamfalme na matajiri wakubwa wa nchi hiyo, pia amefunga maelfu ya akaunti za watu hao. Baadhi ya vyanzo vya habari vimeandika kwamba, Bin Salman ametoa sharti la kuingizwa karibu asilimia 70 ya utajiri wao serikalini kama njia ya wao kuachiliwa huru.

DURU ZA ZANU-PF: CHAMA TAWALA ZIMBABWE KINAPANGA KUMTIMUA MUGABE

Duru za ZANU-PF: Chama tawala Zimbabwe kinapanga kumtimua Mugabe
Viongozi wa chama tawala nchini Zimbabwe cha ZANU-PF wanatazamiwa kupitisha uamuzi wa kumuondoa uongozini Rais wa nchi hiyo na kiongozi wa chama hicho Robert Gabriel Mugabe, ambaye amekuwa akiiongoza nchi hiyo tangu ilipopata uhuru wake miaka 37 iliyopita. Hayo ni kwa mujibu wa duru mbili kutoka ndani ya chama hicho.
Kikao cha dharura kamati kuu ya ZANU-PF kilitazamiwa kufanyika mapema leo kufikiria uamuzi wa kumuondoa kwenye uongozi Mugabe mwenye umri wa miaka 93, siku chache baada ya jeshi kutwaa madaraka kwa lengo la kile kilichotajwa kama kuwachukulia hatua "wahalifu" waliomzunguka kiongozi huyo.
Wakati huohuo, ikimnukuu kiongozi wa Kanisa Katoliki ambaye ni mpatanishi katika mazungumzo na Mugabe, televisheni ya taifa ya Zimbabwe imetangaza kuwa kiongozi huyo atakutana na makamanda wa jeshi hii leo.
Kamati kuu ya chama tawala Zanu-pf inatazamiwa kumrejesha tena kwenye wadhifa wake makamu mwenyekiti wa chama Emmerson Mnangagwa, ambaye kutimuliwa kwake kama Makamu wa Rais na makamu mwenyekiti wa chama hicho kulipelekea jeshi kuingilia kati na kutwaa madaraka ya nchi.
Mke wa Mugabe Grace, yeye anatazamiwa kuvuliwa uongozi wa tawi la wanawake la chama cha Zanu-pf.
Robert Mugabe akiwa na mkewe Grace
Hayo yanajiri huku Rais Mugabe akiendelea kukataa kung'atuka madarakani licha ya kushuhudia kwa macho yake kutokea nyumbani kwake alikowekwa kizuzini jinsi uungaji mkono aliokuwa nao kutoka kwenye chama, vyombo vya ulinzi na usalama pamoja na wananchi ukiyeyuka ndani ya muda wa chini ya siku tatu tu.
Mpwa wa kiongozi huyo Patrick Zhuwao amevieleza vyombo vya habari kuwa Mugabe na mkewe "wako tayari kufa kwa kile wanachokiona kuwa ndio sahihi" kuliko kuachia ngazi ili kuhalalisha kile alichokielezea kama mapinduzi ya kijeshi.
Hayo yanajiri huku makumi ya maelfu ya wananchi wakimiminika kwenye barabara za miji ya nchi hiyo hususan mji mkuu Harare kushinikiza kiongozi huyo ang'atuke madarakani sambamba na kusherehekea kile wanachokieleza kama mwisho wa enzi za miaka karibu 40 ya utawala wake…/

KUSAMBARATISHWA KIKAMILIFU DAESH (ISIS) NCHINI IRSQ

Kusambaratishwa kikamilifu DAESH (ISIS) nchini Iraq
Mabadiliko yanayojiri kwenye medani za vita nchini Iraq yanabainisha kusambaratishwa na kutokomezwa Daesh (ISIS) nchini humo; na kushindwa kikamilifu kundi hilo la kigaidi na kitakfiri ambako ni sawa na kupata mafanikio makubwa Wairaqi katika mapambano dhidi ya magaidi kumeakisiwa sana na duru mbalimbali za habari.
Vikosi vya jeshi la Iraq siku ya Ijumaa viliukomboa mji wa Rawah kutoka kwenye makucha ya magaidi wa Daesh. Kufuatia kukombolewa mji huo kulikochukua muda wa saa kadhaa tu, Waziri wa Mambo ya Ndani wa Iraq Qasim Al-Araji alitangaza kuwa kundi la kigaidi na ukufurishaji la Daesh limesha sambaratishwa kikamilifu nchini humo. Rawah ilikuwa miongoni mwa ngome za mwisho za Daesh ndani ya ardhi ya Iraq. Hivi sasa magaidi wa kundi hilo la ukufurishaji hawana mji mwengine wowote muhimu wa Iraq wanaoushikilia na kuukalia kwa mabavu isipokuwa wanaishia kuzunguka zunguka na kuranda randa kwenye maeneo ya mbali na katika baadhi ya vijiji.
Waziri wa Mambo ya Ndani wa Iraq, Qassim Al-Araji
Mnamo mwaka 2014, kwa uungaji mkono wa kifedha na kijeshi wa Marekani na waitifaki wake wa Magharibi na wa Kiarabu ikiwemo Saudi Arabia, kundi la kigaidi na kitakfiri la Daesh liliishambulia Iraq, likayavamia na kuyakalia kwa mabavu baadhi ya maeneo ya kaskazini na magharibi mwa nchi hiyo. Lakini tangu wakati huo hadi sasa, jeshi la Iraq lilkisaidiwa na vikosi vya kujitolea vya wananchi limeweza kuyakomboa maeneo hayo kutoka kwenye makucha ya kundi hilo; na kimsingi kundi hilo limeshasambaratishwa kikamilifu nchini humo.
Wapiganaji wa jeshi la kujitolea la wananchi la Al Hashdu-Sha'abi
Hata hivyo baada ya kushindwa kijeshi kundi la kigaidi na ukufurishaji la Daesh, suali la kujiuliza hivi sasa ni je, kwa ushindi huo, Wairaqi sasa wataweza kupumua na kupata salama ya kuepukana na shari ya ugaidi? Au kundi hilo la kigaidi na kitakfiri litaanzisha mbinu nyengine mpya na kuendelea kuwaandamana wananchi wa Iraq kwa hujuma na jinai zake za kinyama? Kwa kuzingatia kuwa mashambulio ya kigaidi yalishadidi hivi karibuni katika nchi za Iraq na Syria, tunaweza kusema kuwa baada ya kushindwa kijeshi na kupoteza maeneo waliyokuwa wakiyashikilia kwa mabavu, magaidi wa kundi la kitakfiri la Daesh wameshaainisha mkakati wanaokusudia kuutekeleza mnamo siku zijazo. Ili kufifisha kushindwa kwake kijeshi, kundi la Daesh (ISIS) limeanzisha mbinu na mkakati wa kuvuruga usalama, kwa kushadidisha mashambulio ya kujitoa mhanga ya miripuko ya mabomu pamoja na mauaji ili kuvuruga amani na uthabiti nchini Iraq, sambamba na kupanua wigo wa harakati zake katika nchi nyengine ikiwemo Afghanistan, Libya na kwengineko. Harakati za aina hiyo ni muendelezo wa njia na misimamo ya kufurutu mpaka iliyoanzishwa mwaka 2004 na Abu Mus'ab Az-Zarqawi kwa njia ya kuanzisha mauaji na kuwalenga raia; na baada ya kushadidi hitilafu baina ya Wairaqi ikaandaa mazingira ya kuzaliwa Daesh kutoka kwenye tumbo la Al-Qaeda na kupelekea hatimaye mwaka 2014 kushambuliwa na kukaliwa kwa mabavu kirahisi miji mbalimbali ya ardhi ya Iraq.
Magaidi wa kundi la ukufurishaji la Daesh
Leo hii baada ya miaka mitatu ya vita na mapigano makali ya kujitolea mhanga, yaliyowagharimu roho nyingi za watu na kuwasababishia pia uharibifu mkubwa, Wairaqi wameweza kuyakomboa maeneo yote ya ardhi yao yaliyokuwa yamevamiwa na kushikiliwa kwa mabavu na Daesh; hata hivyo ushindi huo wa kijeshi dhidi ya magaidi wenye misimamo ya kufurutu mpaka sio mwisho wa mapambano, bali inapasa ifanyike kazi ya kuing'oa na kuitokomeza mizizi ya misimamo hiyo hatari. Katika hali kama hiyo, inavyoonekana, baada ya kulisambaratisha kijeshi kikamilifu kundi la Daesh nchini Iraq, vita na mapambano yajayo yatakuwa ni ya kitaarifa na kiintelijinsia ambayo hayatotegemea askari na vifaru pekee; bali yatategemea zaidi unasaji wa taarifa za kiintelijinsia. Katika mazingira ya sasa ambapo magaidi wa kundi la kitakfiri la Daesh wamesha sambaratishwa kikamilifu nchini Iraq, Marekani, ambayo inahisi njama na mipango yake iliyokuwa imepanga dhidi ya Iraq na eneo kwa jumla imevurugika, hivi sasa inashughulika kupanga njama na mikakati mingine mipya ya kiadui. 
Mji wa Rawah uliokuwa ngome ya mwisho muhimu ya Daesh nchini Iraq
Ukweli ni kwamba kundi la kigaidi na ukufurishaji la Daesh limeshafutwa kwenye ramani ya Iraq, na hilo limewezekana kwa baraka na nafasi ya uongozi wa juu wa kidini na kwa kujitolea mhanga vikosi vya Iraq hususan vya jeshi la kujitolea la wananchi la Al Hashdu-Sha'abi. Na hii ni katika hali ambayo jeshi hilo la wananchi lingali linaendelea kuandamwa na njama na tuhuma za Marekani. Kutokana na matukio yaliyojiri huko Iraq wananchi wanapaswa kuwa macho zaidi katika kipindi kinachoanza hivi sasa cha baada ya kusambaratishwa Daesh nchini humo.../

WAFUNGWA WA KISIASA BAHRAIN WAZUILIWA KUWA NA MAWASILIANO YOYOTE NA NJE YA JELA

Wafungwa wa kisiasa Bahrain wazuiliwa kuwa na mawasiliano yoyote na nje ya jela
Duru zenye uhusiano na familia ya Katibu Mkuu wa Jumuiya ya Kitaifa ya al-Wifaq nchini Bahrain, zimeeleza kuwa utawala wa Aal-Khalifa umemwekea vizuizi vikubwa Sheikkh Ali Salman na shakhsia wengine mashuhuri wanaoshikiliwa katika jela za nchi hiyo.
Kwa mujibu wa habari hiyo, Sheikh Ali Salman na shakhsia wengine wakubwa wanaoshikiliwa katikka jela za Bahrain wamezuiliwa kufanya mawasiliano na watu wa familia zao, kupiga simu au hata kusoma magazeti. Katika kuendelea kutolewa hukumu za kidhalimu za utawala wa Aal-Khalifa dhidi ya Sheikh Ali Salman anayeendelea kutumikia kifungo cha miaka tisa jela, utawala huo umewasilisha mahakamani mashitaka mapya dhidi ya shakhsia huyo ya kile kinachotajwa kuwa eti ni kufanya ujasusi kwa maslahi ya Qatar.
Shakh Ali Salman, Katibu Mkuu wa Jumuiya ya Kitaifa ya al-Wifaq nchini Bahrain
Katika uwanja huo, mwendesha mashtaka wa Manama amewasilisha mashtaka hayo dhidi ya Sheikh Ali Salman, Hassan Sultwan na Ali al-Usud, ambao nao pia ni wanachama wa Jumuiya ya Kitaifa ya al-Wifaq kwa tuhuma hizo hizo za kufanya ujasusi kwa ajili ya Qatar kwa lengo la kile alichokisema kuwa eti ni kutaka kuiondoa madarakani serikali ya Bahrain. Kwa mujibu wa taarifa hiyo, hukumu dhidi ya shakhsia hao itatolewa tarehe 27 Novemba mwaka huu.
Maandamano ya Wabahrain
Sheikh Ali Salman alikamatwa mwaka 2014 na utawala wa kidikteta wa Aal-Khalifa na kuhukumiwa kifungo cha miaka minne jela mwaka 2015 kwa tuhuma za uchochezi na kuivunjia heshima Wizara ya Mambo ya Ndani ya nchi hiyo. Hata hivyo mahakama ya rufaa ya nchi hiyo na katika njama za kutaka kumfunga miaka mingi zaidi shakhsia huyo ilimbadilishia mashitaka na kuyafanya ya tuhuma za kutaka kubadilisha utawala na hivyo ikamuhukumu kifungo cha miaka tisa jela.

Friday, November 17, 2017

UMASIKINI UNACHOCHEA MIMBA ZA UTOTONI TANZANIA

Utafiti: Umasikini unachochea mimba za utotoni Tanzania
Imeelezwa kuwa, umasikini na kipato cha chini cha baadhi ya familia nchini Tanzania ndicho chanzo cha mimba za utotoni katika jamii ya nchi hiyo ya Afrika Mashariki.
Hayo yameelezwa na Mkurugenzi Mtendaji wa Taasisi ya Jukwaa la Utu wa Mtoto (CDF), Koshuma Mtengeti katika warsha ya siku moja ya kutambulisha mradi na shirika hilo kwa wadau iliyofanyika mkoani Dodoma. Kwa mujibu wa shirika hilo, utafiti uliofanywa na shirika hilo kwa kusaidiana na mashirika mengine, umebaini kwamba, umasikini wa familia husababisha familia zenye maisha magumu kupambana kwa bidii kutafuta chakula na mavazi ya watoto wao.
Mkurugenzi Mtendaji wa Taasisi ya Jukwaa la Utu wa Mtoto ameeleza kuwa, utafiti wa Demografia ya Afya Tanzania wa 2016 (TDHS) unaonesha kwamba, asilimia 36 ya wasichana wa umri wa kati ya miaka 20-24 waliolewa kabla ya kufikia miaka 18. 
Maandamano ya kupinga ndoa za utotoni nchini Nigeria
Hayo yanajiri katika hali ambayo, kumekuweko na kampeni ya kimataifa ya kukabiliana na ndoa za utotoni hasa barani Afrika.
Mwezi uliopita nchi ya Senegal ilikuwa mwenyeji wa mkutano uliokuwa na lengo la kuongeza hatua za kutokomeza ndoa za utotoni katika nchi za Afrika Magharibi na Kati. Inaelezwa kuwa, wazazi ambao hali zao ni duni kimaisha, mara nyingi huwaozesha watoto wao mapema ili kupunguza mzigo wa ulezi, wakati huo huo, baadhi ya mila na desturi zinatajwa kuwa nazo zina mchango katika hilo.

Thursday, November 16, 2017

WAMAREKANI WAZIDI KUPIGANA RISASI KIHOLELA, MAKUMI WAUAWA NA KUJERUHIWA

Wamarekani wazidi kupigana risasi kiholela, makumi wauawa na kujeruhiwa
Watu 16 wameuawa na wengine 24 kujeruhiwa katika matukio 56 ya kupigana risasi kiholela yaliyotokea katika kipindi cha masaa 24 kwenye maeneo tofauti ya Marekani.
Kituo cha kutoa takwimu za mashambulizi ya silaha nchini Marekani kimetangaza habari hiyo na kuongeza kuwa mauaji na mashambulizi hayo yametokea katika kipindi cha masaa 24 yaliyopoita katika majimbo ya Florida, Michigan, Texas, Ohio na Pennsylvania. 
Kwa mujibu wa kituo hicho cha Marekani, katika kipindi cha masaa 48 yaliyopita, kumeripotia matukio 164 ya kupigana risasi kiholela katika kona mbalimbali za Marekani ambayo yamepelekea watu 45 kuuawa na wengine 88 kujeruhiwa.
Umilikaji silaha ovyo, mgogoro mkubwa kwa Marekani

Takwimu zinaonesha kuwa, jamii ya Marekani ndiyo yenye silaha nyingi zaidi zinazomilikiwa na watu majumbani kuliko jamii nyingine yoyote duniani kiasi kwamba kati ya kila watu 100, 90 kati yao wana silaha nyepesi majumbani mwao.
Takwimu zinaonesha pia kuwa makundi ya utengenezaji silaha yana nguvu sana nchini Marekani na ndiyo yanayodhibiti vyama vya Democrats na Republican, hivyo serikali yoyote inayoingia madarakani haina nguvu ya kupiga marufuku umilikaji silaha ovyo nchini Marekani.

Wednesday, November 15, 2017

VYOMBO VYA HABARI MAGHARIBI VYANYAMANZIA KIMYA JINAI ZA SAUDIA DHIDI YA WAYEMEN

Vyombo vya habari vya Magharibi vyanyamazia kimya jinai za Saudia dhidi ya Wayemen
Wabunge nchini Iran wamelaani vikali mauaji yanayotekelezwa na Saudi Arabia dhidi ya raia wa Yemen huku wakisema jinai hizo zimenyamaziwa kimya na vyombo vya habari vya magharibi.
Katika taarifa siku ya Jumatano, wabunge 191 wa Majlisi ya Ushauri ya Kiislamu ya Iran wamesema katika zama hizi ambazo, madola ya Magharibi, hasa Marekani, hudai kuwa watetezi wa haki za binadamu, tunashuhudia jinai za kuogofya zikitekelezwa na Saudi Arabia dhidi ya watu wanaodhulumiwa na wasio na ulinzi wa Yemen.
Wabunge wa Iran wametahadharisha kuwa Yemen inakabiliwa na maafa ya kibinadamu ambayo yamesababishwa na hujuma ya Saudia dhidi ya nchi hiyo sambamba na mzingiro wa anga, nchi kavu na bahari na hivyo kupelekea misaada ya dharura kama  dawa na chakuka kutowafikia Wayemen. Wabunge wa Iran wamesema Saudi Arabia na waitifaki wake, hasa Marekani, wanabeba dhima ya jinai dhidi ya watu wa Yemen.
Watoto ni waathirika wakuu wa jinai za Saudia nchini Yemen
Taarifa hiyo imeongeza kuwa: "Swali kubwa hapa ni kuwa, je, ni vipi Saudi Arabia inawaua watu wasio na hatia kila siku kwa kutumia silaha mbali mbali hatari huku wanaodai kutetea haki za binadamu wakiwa kimya, bali hata wakiunga mkono jinai hizo?"
Wiki iliyopita Msemaji wa Katibu Mkuu wa Umoja wa Mataifa alieleza wasiwasi wake kuhusu hatua ya Saudi Arabia na washirika wake ya kufunga kabisa mipaka ya Yemen kwa siku ya tano mfululizo na kusisitiza kuwa Yemen inakabiliwa na baa kubwa zaidi la njaa kuwahi kushuhudiwa duniani katika miongo ya hivi karibuni.
Saudi Arabia ikishirikiana na Marekani, Israel na nchi nyingine kadhaa za Kiarabu ilianzisha mashambulizi ya pande zote dhidi ya Yemen Machi mwaka 2015. Maelfu ya raia wasio na hatia wameuawa na mamilioni ya wengine kuwa wakimbizi kutokana na mashambulizi hayo.

NYUMA YA PAZIA LA MASHINIKIZO YA KUIONDOA IRAN NCHINI SYRIA

Nyuma ya pazia la mashinikizo ya kuiondoa Iran nchini Syria
Pamoja na kwamba Iran ni nchi iliyoko mstari wa mbele katika vita dhidi ya magaidi wakufurishaji nchini Syria, lakini waungaji mkono wa nyuma ya pazia wa magaidi wa Daesh (ISIS) hivi sasa wanafanya njama za kuhakikisha wanaandaa mazingira ya kurejea magaidi nchini humo kupitia kukabiliana waziwazi na kambi ya muqawama.
Siku chache zilizopita, Rex Tillerson, waziri wa mambo ya nje wa Marekani alisema: "Askari wa Iran, iwe ni wanajeshi wa Sepah au vikosi vinavyounga mkono na Iran, lazima viondoke katika ardhi ya Syria na kurejea makwao."
Akijibu madai hayo juzi Jumanne, Sergey Lavrov, waziri wa mambo ya nje wa Russia alisema kuwa, Iran iko kihalali nchini Syria na ni kwa ombi rasmi la serikali yenyewe ya nchi hiyo. Vile vile amekanusha uvumi wote ulioenezwa kwamba eti Moscow imeahidi kuwaondoa askari wa Iran nchini Syria.
Brigedia Jenerali Hossein Hamedani wa Jeshi la Walinzi wa Mapinduzi ya Kiislamu aliyeuawa shahidi nchini Syria wakati akijitolea kutoa ushauri wa kijeshi wa kupambana na magenge ya kigaidi

Iran, Russia na Uturuki zimefanikiwa kupiga hatua kubwa katika utatuzi wa mgogoro wa Syria kupitia mazungumzo ya Astana na yumkini kama si mazungumzo hayo, leo hii magaidi wa Daesh (ISIS) wasingelikuwa wamedhoofishwa kiasi chote hiki.
Katika kukabiliana na mafanikio ya mazunungumzo hayo ambayo yamefanyika bila ya kushirikishwa upande wa Magharibi na Kiarabu ambao ni wa waungaji mkono wakuu wa magaidi huko Syria, upande huo umeamua kuishinikiza kambi halisi inayopambana na magaidi yaani Hizbullah ya Lebanon na Jeshi la Walinzi wa Mapinduzi ya Kiislamu SEPAH kama njia ya kuidhoofidha kambi ya muqawama na kuwarejesha magaidi katika eneo hili.
Matamshi ya kutaka walinzi wa Haram waondoke nchini Syria yametolewa katika hali ambayo, hadi hivi sasa Jamhuri ya Kiislamu ya Iran imekuwa ikisema mara kwa mara kwamba kuweko washauri wake wa kijeshi nchini Syria kumefanyika kwa lengo la kuwasaidia wananchi wa nchi hiyo kupambana na magaidi tena kwa ombi rasmi la serikali ya Damascus.
Lau kama Tehran ingelituma wanajeshi huko Syria kwa ombi la Russia au Marekani ni wazi kwamba suala la kuondoa askari hao lingelihitajia idhini ya moja kati ya nchi hizo. Lakini wakati nchi huru kama Iran ambayo si tegemezi kwa nchi nyingine yoyote inapoitikia ombi la serikali halali ya nchi fulani la kuwasaidia wananchi wa nchi hiyo tena katika eneo hili, wakati huo hakuna nchi yoyote nyingine yenye haki ya kuitaka Tehran iondoke nchini humo.
Sergey Lavrov, waziri wa mambo ya nje wa Russia

Wale watu ambao hivi sasa wanapiga domo la kuitaka Iran iondoke Syria kwa madai kuwa magaidi wa Daesh wameshamalizwa nchini humo, wao ndio wanaopaswa kujibu ni kwa nini wana kambi zao za kijeshi katika eneo hili na kwa nini hawaondoi wanajeshi wao waliowamiminika katika kona mbalimbali za ukanda huu? Kwa mfano Washington inajigamba kuwa imelimaliza kundi la Taliban nchini Afghanistan baada ya kuwafurusha mjini Kabul na kwengineko, sasa kwa nini Marekani haiondoi kambi zake za kijeshi nchini humo bali kila leo inaongeza wanajeshi wake? Si hayo tu, lakini pia madola ya kibeberu kama Marekani yanapaswa kujibu ni kwa idhini ya nani yana wanajeshi na yanafanya mashambulizi ndani ya ardhi ya nchi huru ya Syria?
Ni jambo lililo wazi kwamba mashinikizo ya baada ya tawala za eneo hilo na mabwana zao wa nje ya ukanda huu, ya kuitaka Iran iondoke nchini Syria yanatokana na woga wao wa kuongezeka ushawishi wa Tehran katika fikra za walio wengi katika ulimwengu wa Kiislamu. Ushawishi huo wa Jamhuri ya Kiislamu ya Iran ndio uliopelekea kuundika vikosi vya kujitolea vya wananchi katika nchi za Iraq, Syria na Yemen na ni jambo lililo bayana kwamba maadamu vikosi hivyo vya kujitolea vingalipo, Magharibi na vibaraka wao wenye fikra mgando hawataweza kuhatarisha usalama na utulivu wa eneo hili.

RUSSIA YATAHADHARISHA KUHUSU HATUA YA MAREKANI KWA VYOMBO VYAKE VYA HABARI

Russia yatahadharisha kuhusu hatua ya Marekani kwa vyombo vyake vya habari
Msemaji wa Wizara ya Mambo ya Nje ya Russia ametangaza kuwa kila hatua itakayochukuliwai na Marekani dhidi ya waandishi habari na vyombo vya habari vya Russia haitaachwa bila ya jibu.
Dmitry Peskov amesema kuwa hatua yoyote itakayopelekea kubanwa uhuru wa vyombo vya habari vya Russia nje ya nchi haitasalia bila ya jibu; na kwamba hatua hiyo itafuatiliwa pia na fikra za waliowengi na kwa njia za kisheria.  
Dmitry Peskov, Msemaji wa Wizara ya Mambo ya Nje ya Russia 
Katika fremu hiyo, Bunge la Russia (Duma) limepasisha mswada dhidi ya vyombo vya habari vya Marekani vinavyoendesha shughuli zake huko Russia. Bunge la Russia limetangaza kuwa, limechukua hatua hiyo kama jibu kwa hatua za karibuni za Marekani dhidi ya Televisheni ya Russia Today. Mwanasheria Mkuu wa Marekani siku kadhaa zilizopita aliitaka televisheni hiyo ya Russia Today iwe imejisali kama taasisi ya kigeni hadi kufikia tarehe 13 mwezi huu; kinyume chake akaunti za fedha za televisheni hiyo zilizopo Marekani zitafungwa.

SISITIZO LA UN LA ULAZIMA WA KUFUNGULIWA BANDARI YA AL HUDAYDAH NCHINI YEMEN

Sisitizo la UN la ulazima wa kufunguliwa bandari ya al Hudaydah nchini Yemen
Umoja wa Mataifa umepinga sharti lililotolewa na muungano vamizi wa nchi za Kiarabu unaofanya mauaji na umwagaji mkubwa wa damu nchini Yemen ambao umekataa kufungua bandari ya al Huydadah hadi pale matakwa yao ya kiuadui yatakapokubaliwa.
Kwa kweli hivi sasa hakuna watu wa nchi yoyote duniani walio na hali ngumu zaidi kushinda Wayemen. Hakuna mgogoro wowote ulioko duniani ambao hauko pia huko Yemen. Mashambulio ya kikatili ya Bani Saud ni ya kila siku nchini humo. Hakuna matumaini yoyote ya maisha nchini Yemen. Mabomu ya Aal Saud yanachukua roho za Wayemen kila siku huku njaa na magonjwa yakipigana vikumbo katika kuchukua roho za raia wasio na ulinzi wa nchi hiyo. Hali ni mbaya kiasi kwamba hata hakuna takwimu za kina za watu wanaokufa na kujeruhiwa kila leo katika nchi hiyo ya Kiislamu, lakini hata kama tutakubaliana na hizo hizo takwimu zinazotolewa na Umoja wa Mataifa basi tutaona ni kiasi gani Saudi Arabia na wenzake wanafanya ukatili wa kutisha katika nchi hiyo ya Kiarabu. Kwa mujibu wa takwimu hizo, zaidi ya watu elfu nane wameshauawa na makumi ya maelfu ya wengine wamejeruhiwa. Wahanga wa ukatili huo ni wa rika tofauti, kuanzia viajuza hadi vitoto vichanga, wanawake kwa wanaume. Shirika la Kimataifa la Msalaba Mwekundu limesema kuwa, kwa siku watu elfu saba wanaambukizwa ugonjwa wa kipindupindu na kila siku mamia ya raia wa nchi hiyo wanapoteza maisha. Njaa ni nduli wa tatu anayechukua roho za watu huko Yemen pembeni mwa vita na maradhi.
Hakuna waliosalimika na jinai za Saudi Arabia nchini Yemen
Mazingira ya hivi sasa yanasambaza harufu ya kifo kila sekunde nchini Yemen. Mgogoro wa nchi hiyo unakuwa mkubwa sekunde baada ya sekunde kutokana na nchi hiyo maskini kuzingirwa kila upande na kushambuliwa kila siku kwa kila aina ya silaha hata zilizopigwa marufuku. Hivi sasa njia zote za kuwafikishia misaada wananchi wa nchi hiyo zimefungwa. Hadi hivi sasa kumekuwa kukitolewa tahadhari za kutokea maafa makubwa ya kibinadamu ambayo yatakuwa makubwa zaidi duniani katika miongo kadhaa iliyopita. Lakini pamoja na hayo, na kutokana na uungaji mkono wa kila upande wa Marekani, serikali ya Saudia imekuwa ikipuuza tahadhari zote zinazotolewa. Mark Lukok, ni Naibu Katibu Mkuu wa Umoja wa Mataifa katika masuala ya misaada ya kibinadamu. Alisema wiki iliyopita kwamba kama misaada ya binadamu haitafikishwa kwa wananchi wa Yemen haraka iwezekanavyo, basi ukame ambao haujawahi kutokea katika miongo kadhaa ya hivi karibuni duniani, utatokea nchini humo.
Bila ya shaka ni kwa sababu hiyo ndio maana Umoja wa Mataifa umeitaka Saudi Arabia kufungua haraka bandari ya al Hudaydah huko Yemen. Hata hivyo utawala wa kidikteta wa Bani Saud umekataa bali umezidi kung'ang'ania msimamo wake wa kuifunga kabisa bandari hiyo ambayo ndiyo njia pekee ya kuwafikishia misaada wananchi wa Yemen. Saudi Arabia inadai kuwa bandari hiyo ilikuwa inatumika kufanya magendo ya silaha nchini Yemen, lakini imeshindwa kutoa ushahidi wa kuthibitisha madai hayo. Wachambuzi wa mambo wanasema kuwa, kitendo cha Saudi Arabia cha kuifunga bandari hiyo ni ushahidi tosha kwamba ukatili wa wavamizi wa Yemen umeshindwa katika medani za vita na sasa wameamua kumalizia hasira zao kwa wananchi wa kawaida.
Licha ya ukatili mkubwa wanaofanyiwa, lakini wananchi wa Yemen bado wako ngangari, na wamesema katu hawatokubaliana na uvamizi wa nchi yao
Wachambuzi hao wanasema, hatua hiyo ya Saudia ni kujaribu kuishinikiza harakati ya Answarullah na waitifaki wake ili wakubali mapatano, baada ya kushindwa njama zote za maadui hao za kuidhibiti San'a, mji mkuu wa Yemen. Amma swali linalojitokeza habari ni kwamba, Umoja wa Mataifa ni mkweli kiasi gani katika mwito wake kwa Saudia wa kuitaka ifungue bandari ya al Hudaydah huko Yemen? Inabidi tusubiri na kuona ni kiasi gani umoja huo utaweza kuushinikiza ukoo wa Aal Saud katika suala hilo ndipo tutakapoweza kujua ukweli wa Umoja wa Mataifa katika mwito wake huo.

RAIS ROBERT MUGABE WA ZIMBABWE AONDOLEWA MADARAKANI

Rais Robert Mugabe wa Zimbabwe aondolewa madarakani
Jeshi la Zimbabwe limemuondoa madarakani rais wa nchi hiyo Robert Gabriel Mugabe.
Kwa mujibu wa shirika la habari la Reuters jeshi limetangaza kuwa Mugabe na familia yake wako kwenye kizuizi cha nyumbani na kuongeza kuwa jeshi hilo litawapandisha kizimbani wale liliowataja kama "wahalifu" waliomzunguka kiongozi huyo ambao wamesababishia madhara na hasara za kiuchumi na kijamii nchi hiyo.
Sambamba na hayo ofisi ya rais wa Afrika Kusini imetangaza kuwa Mugabe mwenyewe amezungumza kwa njia ya simu na rais wa nchi hiyo Jacob Zuma na kumueleza kwamba amezuiliwa nyumbani kwake lakini yuko salama.
Duru za serikali zimeripoti kuwa Waziri wa Fedha Ignatius Chombo ambaye ni mmoja wa viongozi wa mrengo unaojulikana kama G40 unaomuunga mkono mke wa Mugabe Bi Grace amewekwa kizuizini na jeshi.
Grace Mugabe
Imeelezwa kuwa hatua ya jeshi kuingilia kati masuala ya kisiasa na uongozi nchini Zimbabwe imelenga kumzuia Rais Mugabe kumfanya mkewe Grace mrithi wa urais baada yake.
Aliyekuwa makamu wa rais wa Zimbabwe  Emmerson Mnangagwa amesema hakuna mapinduzi ya kijeshi yaliyotokea nchini humo na kwamba mchakato wa mapokezano ya madaraka umo katika hali ya kufanyika pasi na kutokea umwagaji damu wowote.
Hayo yanajiri huku chama kikuu cha upinzani cha MDC kikitoa wito wa kurejeshwa demokrasia nchini kwa msingi wa kuheshimu katiba.
Askari wa jeshi wakiwa kando ya magari ya deraya kandokando ya mji wa Harare
Chama hicho kimeeleza kuwa kina matumaini kwamba uingiliaji kati wa jeshi utapelekea kuundwa serikali ya kidemokrasia, yenye uthabiti na ya kuiletea Zimbabwe maendeleo.
Hatua iliyochukuliwa hivi karibuni na Mugabe mwenye umri wa miaka 93 ya kumuuzulu  makamu wake Emmerson Mnangagwa iliitumbukiza Zimbabwe kwenye mgogoro na mvutano ambao haujawahi kushuhudiwa.
Hapo jana jeshi lilichukua hatua, kwanza ya kulidhibiti jengo la televisheni ya taifa na kisha kusambaza magari mengi ya deraya katika barabara za kandokando ya mji mkuu Harare.
Jeshi la Zimbabwe limechukua hatua hiyo huku kamanda wake mkuu akiwa ameshaonya hapo kabla kwamba wanajeshi wanaweza kuchukua hatua ya kuingilia kati endapo mwenendo wa kuwauzulu na kuwavua nyadhifa zao viongozi ndani ya chama tawala ZANU-PF utaendelea.../

Wednesday, November 8, 2017

MAANDAMANO MENGINE YAZUKA CATALONIA

Mahakama ya katiba ya Uhispania imetoa maamuzi kwamba kura ya bunge la Catalonia ya hivi karibuni ya kutangaza uhuru kutoka Uhispania ilikuwa kinyume cha sheria. 
 Maamuzi hayo yaliyotolewa leo yamekuja wakati kuna maandamano makubwa ya wanaounga mkono kujitenga waliofunga barabara na njia za treni kama sehemu ya kugomea kufungwa kwa maafisa wa serikali ya Catalonia na wanaharakati wanaopigania kujitenga kabla na baada ya azimio la Oktoba 27.
 Mahakama imeanza kwa kusimamisha utekelezaji wa azimio la kujitenga la mwezi uliopita wakati ikiangazia uhalali wake kutokana na kupingwa na serikali ya Uhispania.
  Zaidi ya barabara 50 ikiwa ni pamoja na barabara kuu zilifungwa na kusababisha usumbufu mkubwa katika jimbo hilo linalokabiliwa na hali ya sintofahamu kutokana na hatua ya serikali yake kutaka kujitenga na Uhispania. Mzozo huo umeutikisa Umoja wa Ulaya unaosaka suluhu kufuatia hatua ya ghafla ya kujitoa kwa Uingereza na kuzua hofu ya machafuko na usumbufu usiokwisha kwenye taifa hilo.

TRUMP AWASILI CHINA

Rais wa Marekani, Donald Trump amewasili China ambapo atakutana na Rais wa nchi hiyo Xi Jinping, huku ajenda kuu ya mazungumzo yao ikiangazia zaidi mzozo wa silaha za nyuklia wa Korea Kaskazini na masuala ya kibiashara.
China Trump auf erster Asien-Reise (picture-alliance/AP Photo/A. Harnik) Donald Trump na Xi Jingping wakiwa na wake zao
Trump amewasili leo kwenye mji mkuu wa China, Beijing akiwa na mkewe Melania na kupokelewa kwa bendi ya jeshi kabla ya kuelekea Forbidden City ambako kuna makumbusho ya kasri la kifalme, mji ambao anakutana na Rais Xi pamoja na mkewe Peng Liyuan.
Saa chache kabla ya kuwasili mjini Beijing, Trump aliitolea wito China kusaidia katika kukabiliana na uchokozi unaofanywa na Korea Kaskazini kutokana na mpango wake wa nyuklia. Ikulu ya Marekani imesema Trump ataitumia ziara hiyo kuiomba China kusitisha uhusiano wake wa kifedha na Korea Kaskazini na kuheshimu vikwazo vya Umoja wa Mataifa. China ni mshirika mkubwa wa kibiashara na Korea Kaskazini.
Akiwa Korea Kusini kiongozi huyo wa Marekani alizitaka China na Urusi kusaidia kuiwekea shinikizo Korea Kaskazini kusitisha kutengeneza silaha za nyuklia na kuileta nchi hiyo katika meza ya mazungumzo. Akizungumza katika Bunge la Korea Kusini mjini Seoul, Trump ametoa onyo kali kwa kiongozi wa Korea Kaskazini, Kim Jong Un ambapo amemtaka asiwadharau na wala asiwajaribu.
''Hatuwezi kuruhusu Marekani au washirika wetu kushambuliwa. Hatuwezi kuruhusu miji ya Marekani itishiwe na silaha za maangamizi. Hatutoogopa. Na hatutoruhusu ukatili mwingine ujirudie katika historia, kwenye ardhi hii ambayo tuliipigania na kufa kwa ajili ya kuilinda,'' alisema Trump.
S├╝dkorea Seoul Trump spricht in der Nationalversammlung (Reuters/J. Ernst) Trump akilihutubia bunge la Korea Kusini
Rais Trump amezitaka Urusi na China kusitisha uhusiano wowote na Korea Kaskazini, ukiwemo ule wa kidiplomasia. Aidha, amesema muda wa kutoa sababu na visingizio umekwisha na kwamba sasa ni wakati wa kuwa imara, kwani mtu anayetaka amani lazima asimame imara wakati wote.
Wizara ya mambo ya nje ya China imesisitiza kwamba nchi hiyo imewahi kutekeleza kikamilifu maazimio ya Baraza la Usalama la Umoja wa Mataifa kuhusu Korea Kaskazini, lakini imesema itachunguza iwapo kuna shughuli ambazo zinakiuka maazimio hayo. Kwa mujibu wa wizara hiyo, China bado ina matumaini ya kuutatua mzozo uliopo kwa njia ya mazungumzo.
Kwa upande wa masuala ya kibiashara, Trump bado yuko katika shinikizo kubwa kutoka kwa mashirika ya biashara ya Marekani katika kutatua malalamiko ya kibiashara na China. Marekani imeishutumu China kwa kurudia ahadi yake ya kufungua masoko yake. Wiki iliyopita Trump alisema kulikuwa na hasara ya kibiashara ya Dola bilioni 347 kati ya nchi hiyo na China na kwamba hatua hiyo ni mbaya na inatia aibu. 
China ni kituo cha tatu cha ziara ya siku 12 ya Trump barani Asia ambayo itamfikisha pia Vietnam na Ufilipino. Tayari kiongozi huyo wa Marekani ameizuru Japan na Korea Kusini.

MWANAMFALME: HAKI ZA BINADAMU ZINAKANYAGWA SANA SAUDIA

Mwanamfalme: Haki za binadamu zinakanyagwa sana Saudia
Khalid bin Farhan Al Saud, Mwanamfalme ambaye amejitenga na utawala wa Aal-Saud, amesema kuwa kabla ya kuomba hifadhi ya kisiasa nchini Ujerumani, kwa muda mrefu alikuwa akiishi kwa wasiwasi na mashaka mengi nchini Saudia.
Farhan Al Saud ambaye ni mpinzani wa utawala wa Saudia ameyasema hayo katika mahojiano na kanali moja ya televisheni ya Ujerumani ambapo amezungumzia kutokuwepo uhuru wa kujieleza na ukiukwaji haki za binadamu uliokithiri nchini humo. Amesema kuwa, baada ya kupinga utawala wa Aal-Saud na kuwasilisha malalamiko ya kuwepo uhuru wa kiraia, alikumbwa na mashinikizo na udhia mkubwa kiasi kwamba alilazimika kujiuzulu jeshini na kutoroka nchi.
Khalid bin Farhan Al Saud, Mwanamfalme wa Saudia
Mwanamfalme huyo wa utawala wa Aal-Saud sambamba na kusisitiza kuwa, haogopi kitu chochote amesema zaidi ya mapendekezo 50 yamewasilishwa kwake kutoka ubalozi wa Saudia nchini Ujerumani yakimtaka aandike taarifa ya kuomba msamaha kwa Mfalme Salman bin Abdulaziz Al Saud lakini amekataa kufanya hivyo. Khalid bin Farhan Al Saud ameashiria pia njama za viongozi wa Saudia za kumuwekea mashinikizo na hata ikiwezekana kumtia mbaroni kwa kumtumia dada yake anayeitwa 'Ibtisam' na anaeshikiliwa katika kifungo cha nyumbani nchini Saudia na kusema kuwa, watawala wa ukoo wa Aal-Saud kwa mara kadhaa walimtisha kwamba ikiwa hatoacha kufichua machafu ya utawala wa kifalme wa Saudia, watamuua dada yake.
Ukandamizaji wa askari wa Aal-Saud
Kwa mujibu wa takwimu na ripoti za ndani nchini Saudia, zaidi ya wanaharakati wa kisiasa na wanasheria elfu 30 wanashikiliwa katika jela mbalimbali za utawala huo wa Aal-Saud.

AMISOM KUONDOA ASKARI 1,000 NCHINI SOMALIA

AMISOM kuondoa askari 1,000 nchini Somalia
Ujumbe wa Umoja wa Afrika nchini Somalia (AMISOM) umetangaza kuwa utaondoa askari 1,000 kutoka Somalia hadi kufikia mwishoni mwa mwaka huu.
Mwakilishi wa Mwenyekiti wa Umoja wa Afrika nchini Somalia, Francisco Madeira amesema kuwa AMISOM imeanza kupunguza idadi ya askari wake nchini humo na kwamba kufikia tarehe 31 Disemba askari 1000 wa kikosi hicho watakuwa wameondoka katika ardhi ya Somalia.
Madeira amesisitiza umuhimu wa kuwepo umoja kati ya raia na jeshi nchini Somalia dhidi ya ugaidi na kusema jeshi peke yake haliwezi kuwashinda magaidi bila ya msaada ya raia. Amewataka Wasomalia wote kushirikiana kwa ajili ya kuwafukuzia mbali wapiganaji wa kundi la kigaidi la al Shabab. 
Kikosi cha majeshi ya Umoja wa Afrika cha AMISOM ambacho kiliundwa kupitia azimio la Baraza la Usalama la Umoja wa Mataifa kimekuwa kikiisaidia serikali ya Somalia kupambana na magaidi wa kundi la al Shabab tangu mwaka 2007. 
Askari wa kikosi cha AMISOM, Somalia
Kikosi hicho kinaundwa na askari elfu 22 kutoka nchi za Uganda, Kenya, Djibouti, Burundi na Ethiopita.
Magaidi wa al Shabab wamezidisha mashambulizi ya kujilipua kwa mabomu katika wiki za hivi karibuni husuan katika mji mkuu wa Somalia, Mogadishu. 

KENYA YAPINGA HATUA YA TANZANIA KUPIGA MNADA ZAIDI YA NG' OMBE 1,300

Kenya yapinga hatua ya Tanzania kupiga mnada zaidi ya Ng’ombe 1,300
Waziri wa Mambo ya Nje wa Kenya, Amina Mohamed ameilalamikia serikali ya Tanzania kufuatia hatua ya taifa hilo kuwapiga mnada zaidi ya ng’ombe 1,300 walioingia nchini humo kinyume na sheria.
Serikali ya Rais John Magufuli ilichukua hatua hiyo baada ya wafugaji kuingia nchini humo na mifugo yao wakitafuta lishe.
Hatua hiyo imekuja siku moja tu baada ya Rais Magufuli kusema kuwa taifa hilo sio shamba la mifugo wa taifa jirani.
Akizungumza katika mkoa wa Kagera ambako alikuwa katika ziara yake ya kikazi Magufuli alisema kwamba Tanzania sio shamba la kuchungia mifugo ya nchi jirani na kwamba ataichukulia mifugo hiyo hatua kali za kisheria. 
Rais wa Tanzania John Magufuli
Vilevile alizitaka nchi Jirani kuchukua hatua kama hiyo iwapo mifugo ya Tanzania wataingia katika mataifa hayo kinyume na sheria.
Hatua ya kuwapiga mnada ng’ombe hao imezua hisia kali miongoni mwa wafugaji wa Kenya baada ya wenzao waliokuwa na mifugo hao kukamatwa na kuzuiliwa kwa kuingia nchini humo kinyume na sheria.
Waziri wa Mambo ya Nje wa Kenya, Amina Mohammed amenukuliwa akisema: ”Tulidhani kwamba mazungumzo ya kidiplomasia yangetatua mzozo huu, lakini tumeshindwa kufikia makubaliano.
Amesema: ”Historia ambayo tumekuwa nayo na Watanzania ni nzuri sana na kila kunapotokea tatizo tumekuwa tukitatua. Ni kwa sababu hiyo ambapo imekuwa hatua ya kushangaza miongoni mwa wafugaji wa Kenya”,
Bi Mohamed amesema kuwa Kenya imekuwa ikiwavumilia wafugaji wa nchi jirani ambao wamekuwa wakivuka mara kwa mara na kuingia katika eneo la Kajiado nchini Kenya.