KIMBUNGA NATE CHASHAMBULIA ENEO LA MISSISSIPPI

Kimbunga Nate kimewasili katika eneo linaloishi watu wachache la pwani katika  eneo ambalo mto Mississippi unaingia  baharini jana Jumamosi na  kushambulia  pwani ya ghuba kwa upepo na  mvua.

Kimbunga Nate kimewasili nchini Marekani

Wakati  kimbunga  hicho  kinachokwenda kwa kasi  kubwa  kikielekea katika  pwani  ya  Mississippi, ambako  kinatarajiwa kushambulia  eneo  hilo na  kutishia kusababisha  mvua  kubwa  na  mafuriko ambayo  yataharibu  nyumba  na  biashara.

Kimbunga  Nate kilitarajiwa  kupita  mashariki  mwa  New Orleans, kikiepuka  kuushambulia mji  huo  kwa  upepo  wake  mkali . Na  kasi  yake  kubwa  ilipunguza uwezekano wa mvua kunyesha  kwa  muda  mrefu  ambazo zingeharibu mfumo dhaifu  wa kusukuma  maji taka.

Mawimbi makubwa katika pwani ya Santa Rosa nchini Marekani

Pamoja  na  hayo, mji  huo  ambao  ni  maarufu  kwa pati za usiku  kucha uliwekwa katika amri ya kutotembea usiku, kuanzia  saa moja jioni na  mitaa haikuwa imejaa  watu kama ilivyo  kawaida  yake katika  usiku  wa  Jumamosi.

Miji katika  pwani  ya  Mississippi kama Gulfport  na  Biloxi ilikuwa katika  tahadhari  ya  juu. Baadhi  ya hoteli zilizoko  katika  eneo  la  ufukwe  na  kasino watu  waliondolewa. Kimbunga Nate kilidhoofika  kidogo na kilikuwa  katika  kiwango cha  kimbunga  namba  moja  kikiwa na  upepo unaokwenda  kwa  kasi  ya  kilometa 85 kwa  saa wakati  kiingia  katika  eneo  hilo ambalo linaishi  watu  wachache  la Plaquemines.

Watabiri  wa  hali  ya  hewa walisema inawezekana  kwamba  kimbunga  hicho  kikaimarisha  nguvu  zake  na  kuwa  katika kiwango  cha  kimbunga  namba  mbili , lakini inaonekana  uwezekano  huo  kuwa  mdogo wakati  usiku  ukiingia.

Matayarisho kabla ya kimbunga Nate kuwasili

Hali ya hatari yatangazwa

Kasi ya  kimbunga  hicho  ilitishia  jamii  inayoishi  mabondeni  kusini  mashariki  mwa Louisiana , mashariki  mwa kijiji  cha  wavuvi  cha Alabama cha Bayou la Batre.

"Iwapo kutakuwa  na  mafuriko  tena, haya ndio yatakuwa," amesema  Larry Bertron  wakati yeye  na  mke  wake  wakijitayarisha  kuondoka  nyumbani  kwao katika  jamii  ya  Braithwaite ya  eneo  la  parishi  ya  Plaquemines ambayo  huathirika  mara kwa mara  na  mafuriko.

Magavaan  mjini  Louisiana , Mississippi  na Alabama wametangaza  hali  ya  hatari. Majimbo  hayo  matatu  hayakupata  madhara  makubwa  katika  kipindi  hiki cha  vimbunga.

Wakaazi wakishirikiana kujaza mchanga katika vigunia kuzuwia mafuriko kabla ya kimbunga Nate kuwasili

Maafisa  wamewaokoa watu watano  kutoka  katika  maboti  mawili  katika  wakati  wa mawimbi  makubwa  kabla  ya  kimbunga  hicho  kuwasili.  Boti  moja  ilipoteza  ingini  yake katika  ziwa Pontchartrain na  watu wawili  waliokuwamo  katika  boti  hiyo  waliokolewa.

Gavana  wa  Louisiana  John Bel Edwards amewahimiza  wakaazi  kufanya  matayarisho  ya mwisho  haraka  na  kusisitiza kwamba  kimbunga Nate kitaleta  uwezekano  wa  upepo mkali ambao  unaweza  kusababisha  mawimbi  makubwa  yanayofikia  futi 11  katika baadhi  ya  maeneo  ya  pwani.