Duru mbalimbali za kijeshi za Sudan zimekiri kuwa wanajeshi kadhaa wa nchi hiyo wameuawa nchini Yemen.
Televisheni ya al Mayadeen ya
nchini Lebanon imezinukuu duru za jeshi la Sudan zinazohusika na vita
vya Yemen zikikiri kuwa wanajeshi watano wa nchi hiyo wameuawaa katika
mapigano na jeshi la Yemen na vikosi vya kujitolea vya wananchi.
Kwa mujibu wa ripoti hiyo, afisa mmoja
wa kijeshi wa Sudan ni miongoni mwa wanajeshi waliouawa huko Yemen.
Wanajeshi wengine 22 wa Sudan wamejeruhiwa.
Rais Omar al Bashir wa Sudan
Mwezi Februari 2016, Saudi Arabia
ilitumbukiza dola bilioni moja katika Benki Kuu ya Sudan na kufanikiwa
kubadilisha msimamo wa Rais Omar al Bashir aliyekubali kushirikiana na
Saudi Arabia katika uvamizi na mauaji ya raia wa Yemen. Hata hivyo fedha
hizo ni kama rehani na amana, wakati wowote Saudia itakapozihitajia,
lazima Sudan izirejeshe. Imechukuliwa hatua hiyo ili kumbana Rais Omar
al Bashir asibadilishe msimamo wake.
Vile vile Saudi Arabia imewekeza katika
miradi ya maji safi nchini Sudan katika hatua nyingine inayoonekana ni
kuwapa hongo Wasudan.
Umoja wa Mataifa unasema kuwa, mgogoro
wa Yemen ambao ulishadidi kutokana na uvamizi wa Saudi Arabia mwaka
2015, umeshapelekea maelfu ya raia wa kawaida kuuawa na miundombinu
kuharibiwa kabisa.
Mechi hiyo ya ligi ya mabingwa barani Ulaya, Champions
League, kati ya Borussia Dortmund na Monaco, ilikuwa ichezwe jana
(11.04.2017) katika uwanja wa Signal Iduna Park mjini Dortmund.
Basi la timu ya Borussia Dortmund limeharibiwa na abiria mmoja
kujeruhiwa baada ya milipuko mitatu kutokea karibu na basi hilo
lililokuwa njiani kuelekea uwanja wa Signal Iduna Park umbali wa kiasi
kilometa kumi ambako mechi ya ligi ya mabingwa, Chamiopns League,
ilitarajiwa kuchezwa. Tukio hilo limetokea mwendo wa saa moja usiku saa
za Ujerumani. Msemaji wa jeshi la polisi katika jimbo la North
Rhine Westphalia, Gunnar Wortmann, aliliambia shirika la habari la
Associated Press, "Basi lilianza safari kutoka hoteli ya timu ya
Dortmund wakati milipuko mitatu ilipotokea. Milipuko mitatu ilitokea
karibu na basi hilo lilipokuwa njiani kuelekea uwanjani na kwamba
mchezaji mmoja amejeruhiwa na dirisha moja kuharibiwa." Beki wa Dortmund ajeruhiwa
Beki wa Dortmund, Marc Bartra
Gazeti
la Ujerumani la Bild limeripoti kwamba beki wa Borussia Doetmund Marc
Bartra amejeruhiwa na kupelekwa hospitali. Klabu ya Dortmund imetuma
taarifa katika mtandao wa kijamii wa Twitter ikisema mchezaji huyo yuko
salama na hakuna kitisho chochote ndani na nje ya uwanja wa Signal Iduna
Park. Mkurugenzi wa klabu ya Dortmund, Hans-Joachim Watzke,
alithibitisha kujeruhiwa kwa Bartra, akisema ameumia mkononi na kuwa
majeruhi si hatari kwa maisha yake. Msemaji wa polisi ya
Dortmund, Nina Vogt, alisema wachunguzi bado hawafahamu chanzo cha
milipuko iliyotokea wakati timu ya Borussia Dortmund ilipokuwa
ikijiandaa kuondoka hotelini kuelekea uwanjani kuchuana na Monaco.
Polisi imesema inalichukulia tukio hilo kuwa shambulizi. Hata hivyo
hakuna dalili kuonyesha ni shambulizi la kigaidi.
Basi la Borussia Dortmund likionekana hapa baada ya mlipuko karibu na hoteli ya timu hiyo kabla mechi
Dortmund
iliamua kuiahirisha mechi hiyo ya duru ya kwanza ya robo fainali ya
ligi ya mabingwa barani Ulaya na kuutangaza uamuzi huo kupitia ukurasa
wake wa Twitter ikiongeza kuwa tiketi zote za mashabiki waliotaka
kuutazama mtanange huo zinabaki kuwa halali na zitatumika leo.
Polisi nchini Zambia imemtia mbaroni Hakainde
Hichilema, kinara wa chama kikuu cha upinzani cha United Party for
National Development.
Stephen Katuka, Katibu Mkuu wa chama cha upinzani cha UPND
ameliambia shirika la habari la AFP kuwa, maafisa wa polisi walivamia
makazi ya Hichilema na kumtia mbaroni bila kutoa maelezo yoyote kwa
familia yake.
Katuka amekosoa vikali hatua ya polisi kumtia nguvuni kinara wa
upinzani bila kutoa ufafanuzi wowote huku akitaja kama kitendo cha
kinyama hatua ya polisi kuvamia makazi ya mwanasiasa huyo bila waranti
na kisha kurusha mabomu ya kutoa machozi katika nyumba iliyokuwa na
watoto wadogo.
Rais Edgar Lungu wa Zambia
Hata hivyo baadhi ya duru za usalama zimedokeza kuwa, Hichilema
amekatwa kwa kuwa mwishoni mwa wiki alizuia msafara wa magari ya
Rais Edgar Lungu, magharibi mwa nchi.
Ni vyema kukumbusha hapa kuwa, Oktoba mwaka jana, polisi ya Zambia
iliwatia mbaroni Hichilema na Geoffrey Mwamba, Mkuu na Naibu Mkuu wa
chama kikuu cha upinzani cha United Party for National Development kwa
tuhuma za uchochezi.
Uchaguzi wa Rais uliofanyika mwezi Agosti mwaka jana huko Zambia
ulikuwa wenye ushindani mkali kati ya Rais wa sasa wa nchi hiyo Edgar
Lungu na mgombea wa upinzani Hakainde Hichilema ambaye alidai kuibiwa
kura.
Karibu walowezi 50 wa Kizayuni leo Alkhamisi
wamekivamia tena Kibla cha Kwanza cha Waislamu yaani Masjidul Aqswa na
kuuvujia heshima msikiti huo mtakatifu kwa ulinzi kamili wa polisi wa
Israel.
Kituo cha Upashaji Habari cha
Palestina kimeripoti habari hiyo na kuongeza kuwa, walowezi Wazayuni
wameuvamia Msikiti wa al Aqsa kwa mara kadhaa katika kipindi cha wiki
moja iliyopita na kuwashambulia walinzi wa eneo hilo takatifu.
Kwa mujibu wa kituo hicho cha habari,
vitendo vya walowezi wa Kizayuni vya kuvamia Kibla cha Kwanza cha
Waislamu vinazidi kuongezeka.
Mwezi Machi mwaka huu. walowezi 1,782 wa
Kizayuni waliuvamia Msikiti wa al Aqsa na kuuvunjia heshima msikiti huo
mtakatifu ikiwa ni ongezeko la takriban mara mbili ikilinganishwa na
mwezi Machi mwaka jana ambapo walowezi 960 walilivamia eneo hilo tukufu.
Masjidul Aqswa, Kibla cha Kwanza cha Waislamu
Mwezi Machi mwaka huu pia, taasisi zenye
misimamo mikali za Kiyahudi zilitoa mwito mara kadhaa wa kuvamiwa na
Wazayuni, Kibla cha Kwanza cha Waislamu.
Masjidul Aqswa imegeuzwa kuwa eneo la
kuonesha jeuri za wanajeshi wa Israel na walowezi wa Kizayuni wenye nia
ya kuupokonya msikiti huo sura na utambulisho wake wa Kiislamu.
Kuwepo msikiti huo mtakatifu na maeneo
mengine matukufu kwa Waislamu na Wakristo, kunaufanya mji wa Baytul
Muqaddas huko Palestina kuwa eneo takatifu kwa wafuasi wa dini hizo
mbili.
Hata hivyo utawala wa Kizayuni wa Israel
unafanya njama za kila namna za kuuyahudisha mji huo na kuupokonya
kabisa sura yake ya Kiislamu na pia ya Kikristo.
Mahakama ya Kimataifa ya Jinai (ICC)
imetahadharisha kuwa ukatili uliofanyika katika Jamhuri ya Kidemokrasia
ya Congo ikiwa ni pamoja na mauaji ya wataalamu wawili wa Umoja wa
Mataifa unaweza kutambuliwa kuwa ni jinai ya kivita.
Taarifa hiyo ya mahakama ya ICC imetolewa baada ya mauaji ya
karibu watu 400 wakiwemo wataalamu wawili wa Umoja wa Mataifa raia wa
Marekani na Sweden katika mkoa wa katikati mwa Jamhuri ya Kidemokrasia
ya Congo wa Kasai.
Mwendesha Mashtaka Mkuu wa Mahakama ya Kimataifa ya Jinai Fatou
Bensouda amesema kuwa, amepokea ripoti kuhusu ukatili unaofanyika katika
mapigano yamayojiri kati ya makundi ya wanamgambo na jeshi la serikali
ya Congo, mauaji ya idadi kubwa ya raia, utekaji nyara na kunyongwa ovyo
watu wasio na hatia. Amesisitiza kuwa vitendo hivyo vinaweza
kutambuliwa kuwa ni jinai za kivita.
Raia wengi wanaoawa Kasai, Congo
Bensouda amesisitiza kuwa hatasita kuwachukulia hatua na kuwapandisha kizimbani watu wanaohusika na uhalifu huo.
Mkoa wa Kasai umekumbwa na ghasia tangu katikati ya mwezi Agosti,
wakati askari wa kikosi cha serikali ya Congo walipomuua Kamwina Nsapu,
aliyekuwa kiongozi wa wanamgambo waasi dhidi serikali kuu Rais Joseph
Kabila.
Wiki iliyopita pia wanamgambo wa eneo hilo waliwaua kwa kuwakata
vichwa maafisa karibu 40 wa jeshi la polisi ya nchi hiyo katika maeneo
ya msituni mkoani Kasai.
Saudi Arabia inafanya mazoezi ya pamoja ya kijeshi na Sudan yajulikanayo kama
'Ngao ya Samawati -1' huku nchi hizo mbili zikijaribu kuimarisha uhusiano wao kutokana na vizingiti vya ndani ya nchi na kieneo.
Mazoezi hayo ya anga baina ya majeshi ya Sudan na Saudia
yanayofanyika katika mipaka ya kaskazini mwa Sudan, yameanza Machi 29 na
yataendelea hadi Aprili 12.
Uhusiano wa Sudan na Saudi Arabia umekuwa ukiimarika katika kipindi
cha mwaka mmoja uliopita. Sudan ni kati ya nchi ambazo zinashiriki
katika hujuma ya kinyama ya Saudia nchini Yemen. Pamoja na hayo,
ushiriki wa Sudan katika muungano huo wa Saudia, sawa na ushiriki wa
nchi zinginezo, ni wa kinembo tu na kwa ajili ya kupata misaada ya
kifedha ya Saudia.
Katika miezi ya hivi karibuni, maafisa wa Sudan na Saudia wamekuwa
wakikutana kujadili uhusiano wa pande mbili katika sekta za kisiasa,
kiuchumi na kijeshi.
Ingawa Sudan inataka misaada ya kifedha katika uhusiano wake na
Saudia, lakini mkondo wa kuimarika uhusiano wao ni katika fremu ya Saudi
Arabia kutaka kujipenyeza na kuwa na ushawishi barani Afrika. Ni kwa
msingi huo ndio maana Rais Omar El Bashir wa Sudan hivi karibuni akatoa
matamshi ya kustaajabisha kuwa eti usalama wa Saudia ni usalama wa
Sudan!
Ndege ya kivita ya Saudia
Sababu kuu ya Saudia kukodolea macho ya tamaa nchi za Afrika ikiwemo
Sudan ni matukio ya kasi Mashariki ya Kati ambayo hayaendi tena kwa
maslahi ya watawala wa Riyadh. Wakuu wa Saudia wanaamini kuwa, hivi sasa
uwezo na satwa yao iko katika mkondo wa kuporomoka katika eneo la
Mashariki ya Kati.
Kwa msingi huo, Saudia sasa inataka kutumia uwezo wake wa kifedha
ili kueneza ushawishi wake ya kisiasa barani Afrika na kupata waitifaki
katika bara hilo. Kwa msingi huo, Sudan imesema Saudia itawekeza dola
bilioni 111 nchini Sudan na kwamba kiwango hicho cha uwekezaji
kitaongozeka maradufu katika siku za usoni.
Wakati huo huo, Saudi Arabia kwa kufanya mazoezi ya kijeshi katika
nchi za Kiarabu na Kiafrika inataka kutuma ujumbe huu kwa nchi zingine
kuwa ina ushawishi mkubwa katika katika nchi za Kiafrika na Kiarabu.
Eneo la Hala'ib la Sudan kaskazini linalozozaniwa na Misri
Weledi wa mambo wanasema hii ikiwa ni mara ya kwanza kwa Saudia
kufanya mazoezi ya kijeshi na Sudan, wakuu wa Riyadh wanataka kutuma
ujumbe kwa nchi jirani ya Misri. Hii ni kwa sababu mazoezi hayo
yanafanyika karibu na mpaka wa Sudan na Misri wakati uhusiano wa Misri
na Saudia unaripotiwa kuvurugika katika kipindi cha mwaka mmoja
uliopita.
Nukta muhimu hapa ni kuwa, licha ya mazoezi hayo ya kijeshi, uhusiano
wa Sudan na Saudia unaimarika kwa sababu ya matatizo yaliyoibuka hivi
sasa katika nchi hizo mbili. Katika upande mmoja Saudia inashuhudia
kufeli sera zake zisizo na busara Mashariki ya Kati huku serikali ya
Omar El Bashir nayo ikikumbwa na matatizo mengie ya kiuchumi na hivyo
kuwa chini ya mashinikizo makubwa ya wananchi.
Rais Beji Caid Essebsi wa Tunisia amesema kuwa Iran ndio tegemeo pekee kwa ajili ya kukabiliana na Israel.
Rais wa Tunisia ameyasema hayo katika mazungumzo yake na Waziri
wa Utamaduni wa Iran aliyeko nchini humo na kuongeza kuwa, adui mkubwa
zaidi wa Iran katika eneo la Mashariki ya Kati ni utawala wa Kizayuni wa
Israel na kwamba anatarajia nchi zote za Kiislamu na Kiarabu zitakuwa
bega kwa bega na Iran katika suala hilo.
Beji Caid Essebsi amesema utawala wa Kizayuni na washirika wake
wanafanya jitihada za kuitenga Jamhuri ya Kiislamu lakini njama hizo
zimegonga mwamba. Amesisitiza kuwa, Iran ni nchi kubwa na
yenye utamaduni tajiri na kwa msingi huo inapaswa kutekeleza majukumu
yake katika eneo la Mashariki ya Kati.
Rais wa Tunisia, Beji Caid Essebsi
Rais wa Tunisia amesema kuwa nchi yake haitaathirika na misimamo ya
nchi nyingine katika uhusiano wake na Jamhuri ya Kiislamu ya Iran.
Kwa upande wake Waziri wa Utamaduni ya Miongozo ya Kiislamu wa Iran,
Ridha Salehi Amiri amesifu uhusiano mzuri wa kiutamaduni, kiuchumi na
kibiashara wa Iran na Tunisia.
Ameashiria hali ya sasa ya Mashariki ya Kati na kusema: Hali ya eneo
hilo imebadilika sana baada ya matukio ya Iraq na Syria na kuongeza
kuwa: Kama si mapambano ya Iran dhidi ya magaidi waliovamia nchi hizo
hii leo magaidi wangekuwa katika miji ya Baghdad na Damascus na kirusi
hicho kingezikumba nchi nyingine za Waislamu.
